1 Kings 11
1 所羅門貪戀當多外國細妹仔。除了埃及王个妹仔以外，佢又討赫人个細妹仔㧯摩押、亞捫、以東、㧯西頓个細妹仔。
2 上主識命令以色列人做毋得㧯這兜外族人通婚，因為姖等會引誘以色列人去拜姖等个神明。總係所羅門貪戀這兜細妹仔。
3 佢討七百個公主做𡜵娘，另外又有三百個細姐；姖等使所羅門離開上帝。
4 在所羅門年老个時，姖等引誘佢去拜外國个神明；佢無像厥爸大衛恁樣對上主—佢个上帝忠心。
5 佢也去拜西頓人个亞斯她錄女神㧯亞捫人邪惡个神摩洛。
6 所羅門行上主看做邪惡个事，無像厥爸大衛恁樣完全順服上主。
7 佢在耶路撒冷東片个山頂起一座祭壇拜摩押邪惡个神基抹，又起一座祭壇拜亞捫人邪惡个神摩洛。
8 佢又為所有外國討來个𡜵娘細姐起盡多拜偶像个地方，俾姖等做得在該位向自家个神明燒香獻祭。
11 對佢講：「因為你故意悖逆𠊎㧯你立个約，毋遵守𠊎个命令，𠊎一定會將你个國搶走，給你个一個大臣。
12 總係，為到若爸大衛个緣故，你還生个時，𠊎毋做這事，愛等到若孻仔做王个時正實行。
13 總係𠊎毋將歸隻國家對佢手中搶走；為到𠊎僕人大衛，也為到𠊎選立个耶路撒冷城，𠊎會留下一個支族給佢。」
14 所以，上主興起以東王後代个哈達做所羅門个對敵。
15 在這以前，大衛征服以東个時，大衛軍隊个元帥約押識到該位去埋葬戰爭死掉个人。
16 約押㧯佢个部下留在以東六個月。該站期間，佢等㓾掉以東所有个男人，
17 只有哈達㧯厥爸个幾個以東僕人逃到埃及，無被人㓾死。(該時哈達還係一個細人仔。)
18 佢等離開米甸到巴蘭，㧯在該位个幾個人會合，然後逃到埃及。埃及王將田地、房屋賜給哈達，也供給佢食物。
19 埃及王中意哈達，甚至將王后答比妮个老妹給佢做𡜵娘。
20 姖㧯哈達𫱔一個孻仔，安到基努拔。王后養育佢，使佢在王宮底背㧯該兜王子共下住。
21 哈達在埃及聽到大衛過身，元帥約押也已經死掉，就對王講：「請俾𠊎轉自家个國家！」
22 王講：「你在𠊎這位敢有欠麼介？做麼介愛轉你个國家去？」哈達應講：「𠊎無欠麼介！只有求王准𠊎轉去！」
23 上帝也興起以利亞大个孻仔利遜做所羅門个對敵。利遜對厥主人瑣巴王哈大底謝該位逃出來；
24 佢招一群強盜來，自家做佢等个頭目。(這事發生在大衛打贏哈大底謝，㓾掉佢个敘利亞同盟以後。)利遜㧯佢个部下去到大馬士革，在該位住。佢个部下擁護佢做王。
25 所羅門還生个時，利遜㧯哈達共樣係以色列个對敵，利遜增加以色列个災禍，又做亞蘭人个王。
26 另外有一個所羅門王个對敵，就係王个一個官員，以法蓮支族个洗利達人，尼八个孻仔耶羅波安。厥姆係寡婦，安到洗魯雅。
27 以下就係佢造反个經過。當所羅門坉平耶路撒冷城東个低窩地，並修補厥爸大衛城牆个時，
28 耶羅波安係一個辦事能力當強个青年人。所羅門發現佢工作認真，就派佢監督所有在瑪拿西㧯以法蓮支族地區个勞工。
29 有一日，耶羅波安對耶路撒冷出來，示羅人先知亞希雅在曠野个路上堵到佢；該時在曠野只有佢兩儕。亞希雅著一領新衫，
30 佢將新衫脫下來，扯做十二垤，
31 然後對耶羅波安講：「你拿十垤去，因為上主—以色列个上帝恁樣講：『𠊎愛將所羅門个國扯開來，分十個支族給你。
32 總係為到𠊎个僕人大衛，也為到𠊎對以色列各支族中所選个耶路撒冷城个緣故，所羅門還做得保留一個支族。
33 𠊎恁樣做係因為所羅門離開𠊎，去拜外國个神明：就係西頓个女神亞斯她錄、摩押神基抹、亞捫神摩洛。所羅門悖逆𠊎；佢無行𠊎看做著个事，也無像厥爸大衛恁樣遵守𠊎个法律誡命。
34 總係𠊎毋對佢該位將歸隻國家搶走；𠊎會俾佢在還生个時繼續掌權。𠊎恁樣做係為到𠊎揀選个僕人大衛个緣故，因為佢遵守𠊎个法律㧯誡命。
35 𠊎愛對所羅門孻仔个手中將國權搶走，給你十個支族，
36 總係留一個支族給所羅門个孻仔。恁樣，𠊎就永遠有𠊎个僕人大衛个後代統治耶路撒冷；這城係𠊎所選立做敬拜𠊎个地方。
37 耶羅波安哪，𠊎愛立你做以色列个王；你會統治你所希望得到个土地。
38 若係你完全聽從𠊎，遵行𠊎个道，做𠊎所歡喜个事，遵守𠊎个法律，實行𠊎个命令，像𠊎个僕人大衛恁樣，𠊎就永遠㧯你同在。𠊎會使你做以色列个王，又使你个後代繼續統治，就像𠊎向大衛所做个一樣。
39 𠊎愛因為所羅門个罪責罰大衛个後代，總係這責罰毋係永遠个。』」
40 所以，所羅門想辦法愛㓾耶羅波安；總係耶羅波安逃到埃及王示撒該位去，住在埃及，直到所羅門過身正轉來。
41 所羅門其他个事，無論佢个成就抑係佢个智慧，全部記在《所羅門史》底背。
42 所羅門在耶路撒冷做王，統治全以色列四十年。
43 佢過身後，葬在厥爸大衛个城；佢个孻仔羅波安承接佢做王。